Bilete og bok

Utstillinga Bilete og bok viser om lag 80 illustrasjonar frå sju bøker, alle illustrert av Ingunn van Etten. I tillegg viser ho bokomslag og illustrasjonar frå bøker og magasin. Nokre av illustrasjonane er vist offentleg tidlegare, andre ikkje. Utstillinga opnar sundag 7. mai kl 17.30, og står til fredag 6. oktober 2023.

Utstillinga er eit tverrsnitt av van Ettens produksjon av illustrasjonar, og eit portrett av ein illustratør frå debuten fram til i dag; ein kunstnar som let fantasien få vengjer og hjelper sjåaren til å flyga.

«Fargar og former er mitt uttrykksmiddel. Eg er oppteken av kommunikasjon, mellom menneske og mellom menneske og det som er rundt. Det symbolske spelar ei stor rolle, humor, leik og spel er andre viktige faktorar. Vekselbruk mellom frie arbeid og arbeid knytt opp til ein tekst er stimulerande og utviklande og høver godt for meg». (Ingunn van Etten)

Van Etten debuterte med måleriutstilling på Hardanger folkemuseum i 1976, like etter at ho kom heim etter utdanning utanlands. To år seinare debuterte ho som illustratør. Deretter vart det fruktbart vekselbruk mellom tekst og bilete og frie måleri, slik ho drøymde om at hennar kunstnarliv skulle vera.

Bokillustrasjonar på utstilling

Gjennombrotet som bokkunstnar kom med illustrasjonane til Tordenguden av Tor Åge Bringsværd (i serien Vår gamle gudelære) og Den dagen det regna kattungar av Hans Sande. Biletkunstnaren har også forfatta to bøker – og sjølvsagt illustrert dei: Trollkjerringa i Hausafjellet og Meistersmeden. Båe baserte på lokale segner. Det var viktig å finna ut korleis ting såg ut på den tida historiene gjeng føre seg for å få illustrasjonane autentiske og truverdige. I dette arbeidet var museet på Utne med sine samlingar ein svært god stad å gjera research, og mykje tid vart også brukt i det lokale biblioteket på Utne. Også i nærmiljøet var inspirasjon og svar. Hjå ein lokal smed fann ho ut korleis dei ulike arbeidsreiskapane såg ut og korleis smeden jobbar i dei ulike prosessane.

I utstillinga Bok og bilete er det også henta fram gjenstandar frå samlingane til museet. Slik vert det ein raud tråd mellom bileta og staden dei vert viste.

Skuleelevar skal og få høve til å djupdykka i van Etten sitt univers gjennom eit pedagogisk opplegg der dei får sjå illustrasjonane i samanheng med aktuelle historiske gjenstandar.

Til utstillinga er det laga katalog med tekst av Mette Bleken.

Biletet er frå boka Sprettert og eg av Hans Sande og Ingunn van Etten.

Lær å sy svartsaum og smøyg

Hardanger folkemuseum og Folgefonn husflidslag arrangerer helgekurs der me tek for oss dei ulike teknikkane som er nytta til hardangerbunaden. På dette kurset får du læra å sy smøyg. Ein vel sjølv om ein vil sy bringklut, belte, eller svartsaum til skjorte eller kaps.

Smøyg er ein svært gamal broderiteknikk, som i utsjånad liknar på veving. Den har vore mykje nytta på bringklutar og belte, og er førebiletet til dei vevde bringklutane mange nyttar i dag. Smøyg har og vore nytta på skjortekragar og på kaps, då som svartsaum.

Kurslærar er konservator på Norsk folkemuseum, Kari-Anne Pedersen. Ho har mellom anna jobba mykje med broderi på skjorter frå Telemark, som har svært forseggjorte smøygbroderi.

Tidspunkt og påmelding

Kurset vert laurdag 7. og sundag 8. oktober, på Hardanger folkemuseum, kl 09.30 – 17 kvar dag.

Påmelding til post@hvm.museum.no / tlf 474 79 884 innan 15. september

Andre tidspunkt kan og avtalast, me arrangerer kurs for grupper heile året.

Ved færre enn 4 påmeldte deltakarar kan kurset verta avlyst.

Prisar

3200,- pr kurs for medlemmar i Folgefonn/Norges husflidslag.

3700,- pr kurs for ikkje-medlemmar

Kurset inkluderer kaffi, kaker og varm lunsj begge dagane.

Kursmateriell kjem i tillegg, alt etter kva ein vel å sy.

Overnatting

Museet har avtale med Utne hotell, som ligg rett ved museet. Deltakarar på kursa får 10% rabatt på overnatting her. Ta gjerne direkte kontakt med hotellet på reception@utnehotel.no og skriv at du skal på kurs. Overnattinga på hotellet inkluderer frukost og femrettars middag. Sjå også utnehotel.no

Det er og råd å finna overnatting gjennom t.d. Airbnb.

For spørsmål og meir informasjon, kontakt Agnete Sivertsen, tlf 95 93 46 98, agnete.sivertsen@hvm.museum.no

Andre kurs finn du her

Konsert med Sigrid Moldestad og Liv Merete Kroken

I duen Spindel, på Hardanger folkemuseum sundag 8.oktober kl 18.30

Ekte musikalsk kjærleik

Sigrid Moldestad og Liv Merete Kroken utgjorde halvparten av det aller første studentkullet ved Ole Bull Akademiet seint på 90-talet. Dei fann tonen, og eit varig venskapbåde med og utan fele oppstod. Spindel duo var eit faktum, og gjorde stor lukke med sine friske tolkingar av slåttar frå Vestlandet og særleg Nordfjord. Årevis med samspel seint og tidleg har resultert i unikt og tett samspel.

Etter ein del svært aktive år, med oppdrag i store og små format og to plateutgjevingar, Spindel (2021) og Aminje (2007), fekk Sigrid Moldestad det travelt med solokarriere medan Liv Merete Kroken hadde musikken som hobby. Dei siste åra har dei funne tid og rom til å ta opp att Spindel duo-spelet, til glede for seg sjølv og alle som er glade i godt slåttespel. Då dei markerte sine første 20 år som duo, kalla dei det for ei 20 år gamal musikalsk forelsking, men me trur det er snakk om ekte musikalsk kjærleik!

Sigrid Moldestad-hardingfele

Liv Meret Kroken–hardingfele

Hjarteleg velkomne alle!

Konsertane på Hardanger folkemuseum vert arrangerte i samarbeid med Hardanger folkemusikksamling og med støtte frå Norsk kulturråd. VestaFolk er eit turnétilbod frå Førdefestivalen. Turnéen med Spindel er støtta av Vestland fylkeskommune og Sparebankstiftinga Sogn og Fjordane.